वेल

वेल नाजूकशी सांजवेळी

लाजत बघे त्याच्या भाळी

लावण्यवती डुले वा-यावरी

सा-यांचीच नजर तिच्यावरी

तिच्या मोहक रूपा भाळून

तटस्थ वृक्षही पाहे वळून

हलकेच जवळ घेतले त्याने

भोवती फेर धरले तिने..

जांभळ्या तिच्या फुलांतून

शहारत होता तोही आतून

येऊ लागली फुलपाखरे

त्याला रंगच नविन सारे..

बहरताना तिने वर पाहिले

आधाराला हात उचलले..

त्याच्या फांदीचे हात वाकले

झटकन तिने ते हात पकडले

फुलत होते प्रेम एकमेकांत

चर्चा नि कुतुहल सा-या वनात

वडाच्या मिठीत लाजली लताराणी

पाखरे गाऊ लागली प्रणय गाणी

विनिता धुपकर