भाकरी

लढा त्यांचा होता

भाकरीच्या तुकड्यासाठी

अंगभर कपड्यांसाठी आणि

चार भिंतीं छपरासाठी

दुःखाचा उन्हाळा अनेकदा

डोईवरून सरकला

चांदणे कितीदा आले तरी

भाकरीचा चंद्र नाही गावला

वाळलेच नाहीत कधी

अश्रू डोळ्यातले

हात हतबल एकमेकात

घट्ट अडकलेले

झगमगत्या मुंबापुरीतल्या

गिरणगावी मिट्ट अंधार

कंदिलातल्या बेईमान

वातीचाही बहिष्कार..

मिणमिणत्या प्रकाशातल्या

लांब लांब सावल्या

चमकणाऱ्या डोळ्यातल्या

आशेच्या बाहुल्या

विनिता धुपकर

( फोटो - साने गुरुजी प्रतिष्टान कलादालन, इंदापूर येथील गिरणी कामगारांच्या लढ्यावर आधारित एक भाकरीवर कलाकृती)