चित्र

कधी

अचानक चित्र कोठूनी

स्वप्न होऊनी येते

कुणीतरी त्या चित्रामागून

मजसि खुणवित असते

स्वप्न व्यापूनी सर्व जाणिवा

गीत गाई ह्रदयात

कसे आणू मी विश्वच अवघे

चित्राच्या खिडकीत

द्वंद्व मनाचे गूढ मनाशी

उधळूनी रंग आकाशी

हलके अलगद चित्र अवतरे

धुक्यातून या क्षितीजी

चित्र मनातील रंगव आता

धवल शुभ्र पटलावर

कुंचल्या तुला दिसेल का रे

चित्र उभे क्षितीजावर

चित्रातूनी रंगले चित्र हे

मिठी मारूनी स्वप्नाला

मजला अजूनी कळले नाही

खुणवी कोण चित्राला

विनिता धुपकर