नव वर्षाचे आगमन

आगमन नव्या वर्षाचे

उधळण नव्या रंगांची

ओंजळभर फुले माझी

नव्या सानुल्या स्वप्नांची

कालची मरगळ उतरवून

आनंदवस्त्रे परिधानली

नवा आश्वासक श्वास

चैतन्य गंध भोवताली

आशेची प्रकाश किरणे

काळ्या ढगांना सारून

नव्या पालवी पानांवर

हिरव्या कथा लिहून

राग मांगल्याचे गाती

पक्षांची मधूर गाणी

वाराही कानांत सांगे

उद्याची प्रेम कहाणी

वसुधे तुझा विश्वास

राहू दे हात शिरावर

तुम्हा आम्हा सर्वांना

सदिच्छा आभाळभर...!

विनिता धुपकर