पाऊलवाट

रोजच्याच रस्त्यावर

खुणावणारी पाऊलवाट

हिरव्या पोपटी रंगांमधून

गेरूचा कुंचला वळणदार

मीही निघाले मागोमाग

शोधत एक नवे गाव

असेल का ते स्वप्नातले

पाऊलांना नसे ठाव..

मान बोलू लागली होती

ताडांची उंची मोजताना..

तुफानातही ताठ उभे

समतोल अचूक जपताना..

सूर्याचे लहरी प्रतिबिंब

शांत वाहत्या पाण्यावर

प्रतिबिंबाचे प्रतिबिंब

हलते पानांच्या देहावर..

हिरव्या छटांचे अंगरखे

हलवी पानांच्या झालरी

पाखरांची चलबिचल

ह्यावरून त्या झाडावरी..

अशाश्वत तरी आनंदवाट

जगण्याचा मंत्रपाठ

सावळ्या उदास दिवसातला

मोकळा हिरवा श्वास..

विनिता धुपकर