हिरवाई

पाचूच्या हिरव्या वाटेवर

घट्ट मिठी हिरवाईची

माहेराची हिरवी शाल

अंगावर लपेटून ऊबेची...

मायेचा गारवा तिच्या

हिरव्या ओल्या गाभ्यात

शिणल्या मनाने साठवले

हिरवे श्वास हृदयात..

फांद्यावरती पाखरांची

हिरवी किलबिल कहाणी

हिरवा चुडा पानांचा अन्

हिरवी कंच पैठणी..

जळात हिरवी थरथर

हिरवाई नभांगणी..

वृक्षवल्ली सुरात गाती

हिरवी मंजुळ गाणी...

असेच व्हावे जीवन

मंगलमय नि हिरवेगार..

हिरवे तोरण दारावरती

घर हिरवाईत नदीपार..

विनिता धुपकर